LAWAK NOGORI SEMILAN...

ASSALAMUALAIKUM...

CORAT-CORET PAK ENGKU...

Dah lamo na ese tak cakap loghat Nogoghi Sombilan. Loghat Nogoghi Sombilan yang pokat boto-boto.. Jadi coghito ese kali ini adolah untuk sumo orang Nogoghi Sombilan. Tak kirolah kek mano dio orang tingga. Kek Kolumpo ko, Pulau Pinang ko atau kek mano sajolah waima kek luar nogaro sokalipun misal ea kek Jopun, Landon ko atau mano-mano jolah..

Coghito yang ese nak coghitokan ini adolah untuk latihan bagi orang=orang Nogoghi Sombilan yang lidah ea dah koreh dan dah lupo cakap loghat Nogoghi Sombilan. Pado orang-orang yang bukan orang Nogoghi Sombilan yang minat nak paham chogito ese ni tanyolah kek orang Nogoghi Sombilan yang dio kona dan masih pokat cakap loghat Nogoghi Sombilan ea.

Ni deh aa coghito ea..

Alkisah mako tosobutlah satu coghito kek nogoghi den ni..Nogoghi yang ramai pondeka-pondeka!. Pado satu haghi rajo pun mintak kek Momando Datuk mongumumkan kek rakyat jolato bahawo dio akan mongadokan potandingan nak momilih podeka-pondeka baru bagi monggantikan pondeka-pondeka lamo yang dah lapuk dan dah mulo nak ghoyeh tu. Jadi sapo-sapo pomudo yang nak masuk botanding dan bominat nak jadi pondeka bulehlah moncubo nasib ea.

Rajo ni punyo rancangan potandingan yang gilo-gilo gak. Tak tahulah apo punyo kopalo, rajo ni. Potandingan ni iolah boronang molinteh sungai. Sungai ni lebar ea agak-agak sotongah batu. Kalau ikut uko sokarang lobeh kurang 80 meter lah agak ea. Air sungai ni dalam dan kek dalam sungai ado banyak buayo ganeh. Jadi, paham-paham jo lah. Kalau tak lopeh boronang kek soborang sungai ni mako dah tontu mampuihlah dibaham kek boyo-boyo ganeh tu. Rajo jugak menambah, siapo yang bojayo boronang dan lopeh ko soborang tu, buleh mintak apao sajo dongan rajo dan rajo akan pasti tunaikan. Mintaklah apo yo!

Moko pado hari yang dah ditotapkan untuk potanding tu boduyun-duyunlah rakyat jolato yang datang nak tengok potandingan ni. Waktu tu tongah hari gekgho. Rakyat yang datang tu ado yang botunkek, naik tandu dan ado yang totepok-tepok bojalan dongan dipimpin. Kek topi sungai tu ado yang bodiri, ado yang moncangkung, ado yang duduk dan ado gak yang monyolanak kek ateh rumput topi sungai tu. Tompek rajo ado pundung khas, ado tompek duduk khas dongan Datuk-Datuk ea,

Sebaik nak mulo, bobunyilah tabuh monandokan potandingan nak bomulo.
Rakyat jolato riuh rondah botopuk sorak monantikan siapo pomudo yang borani nak mulo boronang monyoborangi sungai tu. lamo dio orang monanti. Tak ado sorang pun pomudo yang borani nampak ea!

Bodobau!!!! Tibo-tibo sorang pomudo tu yang badan ea bosa tinggi ea lobeh kurang tujuh kaki dan bukak dado ea tigo kaki, torojun ko dalam sungai dan bolocapuih boronang. Bukan main amek laju dan kuek ea hinggokan air sungai borambak bosa dan boyo-boyo tokuak ko topi. Sampai kek soborang sungai, pomudo tu tocungap-cungap macam nak putuih napeh ea.

Sumo yang nengok PIC GOOGLE UNTUK HIASAN.
bosorak gombiro botopuk tangan. Dio orang kagum tengok koboranian pomudo ni. Lalu rajo pun bangun menitahkan supayo pomudo ni datang mongadap dio. Momando Datuk pun poie dokek pomudo tu lalu bokato, "Jang osah handa ekau. Rajo nak jumpo ngan ekau. Moh poie jumpo dio."

Pomudo ni pun poielah ikut Momando Datuk ni bojumpo rajo. Sobaik sampai dopan rajo, rajo pun botanyo, "Wahai orang mudo yag borani, kamu telah bojayo dalam potandingan ini, Aoakah pomintaan kamu supayo beto buleh tunaikan."

Dongan napeh yang masih tocungap-cungap pomudo tu pun bokato, "Tuanku, ese tak nak mintak apo-apo doh. Cumo ese nak tahu siapo cilako gampang yang tolakkan ese ko dalam sungai tadi. Dio nak suruh ese mampuih ditolan kek buayo ko?"

Rajo pun tocongang-congang bilo nonga kato-kato pomudo tu.

Camtulah alkisah coghito ea..

Sokian Tamattul Al Kalam.