بِسْــــــــــــــــــمِ اﷲِالرَّحْمَنِ اارَّحِيم
  • Anak2 yg bosokolah zaman sokarang untung bobona. Poie sokolah naik keto atau moto abah atau omak anta.. Tak pun naik bas sokolah!!! Kalau yg sokolah monongah tu, siap abah omak ea bolikan moto laie. Bolanjo sokolah bohinggit-hinggit. Soluar, baju & kasut, maha-maha! Branded-branded laie!!! Den dulu poie sokolah jalan kaki. Dari Kg Pantai ko Soromban jo naik bas. Pakai pas. Bayar bulan. 6 ringgit sobulan!! Lain dari tu jalan kakilah.. jalan kaki duo tigo batu ni no hal bagi den maso tu!!... Kasut sekolah den, kasut kanvas jenis Fung Keong, kasut jenis yg paling murah pado maso tu. Nak boli kasut Bata mimpilah den! Bungo tapak kasut tu mcm bungo tayar trktor.... Tak sampai 6 bulan bocor tapak kasut tu sobab dek banyak bona den bojalan kaki! Kasut yg dah bolubang tapak ea tu, de kono pakai gak sampai ujung tahun sobab abah omak den tak mampu nak ganti & bolikan yg baru. Bilo jalan lopeh hari ujan, basah setukin den sobab air masuk ikut tapak kasut den yg bocor tu. Soluar den maso Primary School & Lower Form Secondary School (Form 1 - 3), soluar pendek berwarno putih. Tak sampai duo hari pakai, molotong, mcm bolacan rupo ea, kato omak den! Kain soluar tu, cotton biaso, bukan kain yg maha-maha. Said kek soluar tu tajam & kogheh sobab pakai kanji. Maso tu, soluar panjang, dah Form Four yo sumo murid pakai! Abah den bilo boli soluar baru dio akan bolikan den soluar pendek yg mcm skirt. Makno ea soluar pendek tu, kaki seluar ea panjang sikit sampai bawah lutut. Alasan abah den, soluar tu buleh pakai sampai tigo tahun & muek laie. Kalau buntut soluar tu dah kuyak omak den akan jahit. Mako jadilah buntut soluar tu mcm sarang labah2 corak ea! Den kono pakai gak. Nak buek camno.. Nak malu apo? Dah abah omak den orang mosokin!! Den poie sekolah jarang ado bolanjo atau omak den bokakan apo2 utk makan kek sekolah bilo den lapa.. Kek sokolah bilo den tengok budak2 lain makan & minum den tokulat-kulatlah momandang & toguk air liur yo lah. Bodogup-dogup. Songkeh poghut den dek air liur.. Hiii... hii... hiiiii... Bukan omak den tak nak buekkan boka utk den bawak ko sokolah, tapi bondo nak dibuek boka tu tak ado!! Kek sekolah kalau tokak den koghing@haus, den balun air paip@paipsikola kek sekolah tu sampai hilang haus dan konyang atau poghut den kombung!! Eerrrkkkk!!! Den akan jumpo nasi dlm pukul duo bilo den balik & sampai kek umah dr sokolah..
    Nak dijadikan corito, satu ari tu, sowaktu abih sekolah & tunggu bas sokolah, adolah sorang murid tu yg tunggu abah ea jomput dio, main songgayut2 kek palang pagar dopan sokolah. Waktu dio bosonggayut dgn kodudukan kopalo ea ko bawah, dongan kohondak Allah juo agak ea, jatuhlah duit 50 sen dari saku baju ea tu ko tanah. Budak tu tak porasaan pun. Den pun apo laie, copek2 den poie kek duit tu & den pun pijak sambil bodiri. Tak bogorak sikit pun. Bilo budak tu abah ea dah ambik bawa balik den pun ambik duit tu. Bukan main suko hati den laie!! Den ajak 3 orang kawan den poie kek stall jual ice ball (ais kopal). Den bolanjo kawan2 den ice ball sorang satu. Tau tak apo ais kopal tu atau Ice Ball tu? Maso sokarang takdo laie bondo tu ponjajo jual.. Ice ball@ ais kopal tu ialah air batu yang disagat dalam mangkuk bulat, dikopal bulat mcm bola, lopeh tu bubuh warna merah, kuning & hijau serta dibubuh air gula. Kito orang sobut maso tu, 'air batu kopal!!!' Abih langsai duit tu! Makan haram den hari tu.. Duit haram den bolanjo kongkawan den makan!!! Maso tu mano den kiro.. Den kiro memang dah joki den aghi tu!!! Nakal & jahat abih!!!! Hiii...hi.... hiii..
    Peristiwa itu sampai aghi ni den ingat walaupun maso kjadian tu den dlm darjah SMC Two. Kiro2 darjah limolah sokarang ni... Umur dlm 11 tahun... Kiro2 bodoso tak den buek macam tu????
    Bilo toingat peristiwo ni den teringat kengkawan sokampung den. Kengkawan yg bolajar samo2 satu kelas kek sokolah King George V Primary school. Kengkawan yg den bolanjo dio orang air batu kopal tu. Shaari@Chayi, (moningga dunio sotahun lobeh dah), Muhammad Johar@Amat Ghimau, (kini monotap kek Manjung, Perak, lopeh pencen Navy) & Rosman Amat Bodek@Ayuih (sokarang monotap kek Merlimau , Molako lopeh pencen Penolong Pogawai Potanian).
    Bilo tokonang berbagai poistiwa maso kokocik, den toingat lagu lamo dendangan Biduan Allahyarham R.Azmi... 'Terkenang Semasa Dulu@Hati Rindu'. Den sayu bilo dongar lirik rangkap toakhir lagu tu...
    "Miskipun hati ku rindu....
    Ingatkan waktu yang lalu...
    Oooo.. oooo... oooo.... oooo...
    Namun itu hanya mimpi...
    Tak akan menjelma lagi..
    Ku rasakan alam nan sepi..
    Menangis aku menanti...(huuuu...huuu....huuu....).

Terima kasih bersama Karyaku...Paridah Ishak. Komen anda amat dihargai... “Semoga Allah SWT akan membalas dirimu dengan kebaikan yang banyak dan semoga Allah SWT akan membalas dengan balasan yang terbaik.”