KE JOLOBAK KE JELOBU...

ASSALAMUALAIKUM...

KALI ni den nak bocoghito panjang-panjang tak ado 'mood' lak. Yang ado 'moog' maleh. 'Mood' rajin ontah mano poie ea. Jadi jangan tak ado apo-apo lansung, ni ha den nak tulihkah tigo rangkap pantun orang noghoghi den. Noghoghi mano laie, Noghoghi Sombilanlah! Pantun yang dah ado sojak sokian lamo dulu. Budak-budak sokarang mungkin ado yang tak ponah donga pun pantun ni agak ea. Maso den masih kokocik laie, yang den tahu pantun ni dah ado. Ni ha deh pantun ea:-

JOLOBAK KO JOLOBU,
TUAI PADI TIGO TANGKAI;
KONO KOMAT ORANG JOLOBU,
TAK MATI BADAN MORASAI.

KALAU NAK TAHU PODEH EA LADO,
DITUMBUK-TUMBUK DIGILING-GILING;
KALAU NAK TAHU BANYAK EA JANDO,
KEK KOLOPILAH KAMPUNG SONALING.

SUNGAI SONALING AIR EA DOREH,
HANYUT KAYU LINTANG PUKANG,
KAMPUNG SONALING ADAT EA KOREH,
KAHWIN JANDO TAK BULEH HUTANG.

Pantun yang di bawah ni lak, pantun arwah oamak den dulu-dulu..

GORENG KEREPEK AMBIL SOCOKUP,
JOMOR KEREPEK DI ATEH UPEH;
SOBOLUM DAPEK TAK CUKUP-CUKUP,
BILO DAH DAPEK TAK ABIH-ABIH.

Dalam makno ea pantun arwah omak den tu! Cubo ronung, monung dan faham-fahamkanlah!

Dan pantun duo korek arwah omak den yang den masih ingat iolah:-

LONGKUEH PUCUK KANGKUNG,
SELERO PUEH BADAN MONANGGUNG,

LONKUEH TOPI KANDANG,
SELERO PUEH NYAWO BOTONDANG.

KAMBING DALAM PORAK PANJANG JANGGUT EA,
ORANG TAK ONDAK BANYAK SANGKUT EA.

PISAU BADIK BAWAK KO HUTAN,
RUPO CANTIK KOLAKUAN BAK SETAN.

Bogitulah sorobo sodikit corat-coret den malam ni sobolum den nak masuk tido ni ha....

Sokian. Tammatul Al Kalam.

FB PAK ENGKU.