بِسْــــــــــــــــــمِ اﷲِالرَّحْمَنِ اارَّحِيم

Tak lamo laie aghi nak ghayo
Mesti banyak kito nak koluar bolanjo
Kalau kayo, duit banyak, tak apo
Tapi kalau duit ado sociput, abih tu, nak wek cam mano?

Baju dan kasut baru untuk anak-anak dan isteri
Sudah tontu nak kono boli
Kok tak muncong dio orang akan panjang nanti
Dan buleh ditanjo ngan tali bolati
Atau dio orang akan morengek tak ronti-ronti
Memang lomeh dibuek ea nanti.

Lauk pauk dan kuih-muih mestilah nak ado
Di hari rayo,kek ateh mejo kosong yo apo lak rupo
Kok datang kengkawan dan sedaro maro
Mano lak nak di suruk muko
Malulah nanti anak bini kito!

Dalam bab bobolanjo ni, kito konolah pikir teliti
Tak kirolah di aghi ghayo atau apo pun aghi
Kalau gajah berak bosa, kancil pun nak ikut sokali
Tontulah akan kebebangan dan buleh bawak mati.
Oleh itu, bilo bobolanjo, ukorlah baju kek badan sondiri!

Pobidalan orang-orang Minangkabau pun ado bokato
Kok pitih sokupang gonap yang ado
Janganlah kancah yang bokorawang nak diboli jugo
Atau nak boli si burung nuri yang pandai bokato-kato
Memanglah nak monompah ponyakit dan balo!!!

Janganlah sobab dek nak sakan bogayo
Abih bergadai golok ghoto yang ado
Takut nanti dah abih ghayo
Along dan ceti mongojar kito
Kok nampak dek jiran totanggo
Takkah malu kito!

Bojimat coromat tu amalan yang mulio
Jangan nak bosinggit dongan orang yang kayo
Itu pobuatan yang tak baik dan Tuhan pun tak suko
Tekadkan hati bobolanjolah takat yang ado
Jadi, takdolah kito dibolit utang sampai ko tuo!

Itulah deh sikit, nasihat yang dapek den boghikan
Itu pun kalau nak pakai, taknak buangkan
Ini sobab sosamo kengkawan, den ingat mongingatkan
Kalau den tosilap, tolonglah maafkan.

Dan satu laie, zakat fitrah jangan lupo
Bayar untuk diri sondiri, bini dan anak-anak kito!

Pojam colik, pojam colik Ramadan tibo
Pojam colik, pojam colik, Syawal monjolmo
Den takut pojam, tak colik-colik itu laie bahayo
Jadi, pado kengkawan, ampun dan maafkanlah kosalahan den yo
Mano tahu kok kito tak dapek laie bojumpo!!!

Solamat Aghi Ghayo pado somuo
Doakan den panjang umo
Dapeklah laie kito bosuo muko
Tak kirolah kek laman Fb atau kek mano-mano!!!!

Terima kasih bersama Karyaku...Paridah Ishak. Komen anda amat dihargai... “Semoga Allah SWT akan membalas dirimu dengan kebaikan yang banyak dan semoga Allah SWT akan membalas dengan balasan yang terbaik.”